Ourganizado por la ACREFA i cun l apoio de la Compratiba Ribadouro , de la Junta de Freguesie de Bila Chana i de la Cámara Munecipal de Miranda de l Douro realizou-se l 2º. Cuncurso de binos de l Praino, feitos por biticultores, a que cuncorrírun 14 binos de ubas de la nuossa region.
La cara era buona
L cuncurso era para binos tintos, mas sabemos que ls nuossos biticultores, por bias de las castas i de ls gustos de las gientes de l Praino, fázen siempre binos pouco carregados, yá que l bino ye para eilhes i ls ami(gos) bebéren. Este cuncurso ye amportante para podéren saber de la culidade de l que fázen i haber gusto por melhor de un anho al outro.
Membros de l júri, a la dreita l candidato pul PS a presidente de la câmara
Membros de l júri, a la squierda l candidato pul PSD a presidente de la câmara
Fazimos parte de l júri de l’anho passado i de l deste anho i podemos dezir que ls binos melhorórun muito, tanto ne l gusto cumo na culidade i cuidado cun que ls fazírun. Por l que se biu al acabar, quedou an todos, la buntade de pal anho fazer melhor, habendo ls que pénsan ya na scuolha de las ubas i na melhorie de las tequenologies.
L que ganhou l purmeiro prémio
L cumbibio final
Acabado l cuncurso i antregues ls prémios, toca de probar ls binos, ne l salon de la ACREFA , que yá habie porparado la merenda. L presidente de la Compratiba aporbeitou la oucasion para falar culs associados subre la Compratiba i l’ajuda que puode dar als sócios, atrabeç de la einologa, para ls ajudar a fazer melhores binos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
