Ye de l coincimiento de muita giente que ls mirandeses son fuonte de cultura por todo lado i muito mais ne l stranjeiro. Ls eisemplos son muitos i son muitos ls que nas tierras adonde stan, loinje de l Praino, todo fázen para perserbar la nuossa léngua i las nuossas tradiçones.
L grupo de pouliteiros de Samartinenses de Bordéus
Todos ls anhos la “rádio Alfa” faç na Paris ua grande fiesta para ls pertueses de la region de Paris i adonde ban cada beç mais franceses tamien. Muitos son ls artistas que ban partecipar nessa fiesta i este anho nun faltórun alguns de ls melhores. Mariza, Quim Barreiros i ls pouliteiros de San Martino.
La fiesta ajuntou melhares de pessonas
Ls pouliteiros de San Martino, nun son mais que l grupo de ls eimigrantes de San Martino, que bíben an Bordéus. Muitas associaçones de pertueses, por toda parte de l mundo, porcúran mantener las tradiçones de las sues tierras i ls mirandeses de l Praino, ténen tamien ls sous grupos de pouliteiros.
%5B1%5D.JPG)
L grupo de Samartineiros a dançar na fiesta, an Paris
Dou-bos esta nuoba por dues rezones, ua para amostrar l que fázen pul mundo ls mirandeses i por outro, para bos amostrar las fatiotas de ls dançadores, que nun úsan saias. Tamien ls sendineses tubírun grupos de pouliteiros pul mundo afuora i tenemos esso recolhido, cun nomes i locales. Quanto a las fatiotas, usában-se cunsante las puosses de ls grupos i las oucasiones. Sendin tenie trés tipos de fatiotas – la mais usada era cumo la desse grupo de Samartineiros.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
