Hoije, die 10 de Júlio – feriado munecipal, fui apresentado l purmeiro camboio turístico eilétrico, para andar na cidade i ouferecido por la EDP. Este camboio ten cumo oujetibo dinamizar l turismo na cidade i al miesmo tiempo senseblizar la giente para outelizar einergie melhor para l ambiente. Será tamien ua maneira de lebar ls ninos de todas las aldés a béren Miranda i daprendéren a gustar de l património. Fui inda apresentado l porjeto transfrunteiriço “Linha Mestra” , de la Direcção Regional da Cultura do Norte.
L camboio (retrato de Carla A Gonçalves )
Tamien pulas 12 horas, se einaugurou na Biblioteca Munecipal Padre António Maria Mourinho, an Miranda do Douro, la “Exposição Documental e Fotográfica - Diálogo de dois intelectuais em torno da História e da Cultura do Nordeste Transmontano - Joaquim Rodrigues dos Santos Júnior e António Maria Mourinho” , Na miesma sesson, apresentou-se l Catálogo de la Sposição de la outorie de Maria Olinda Rodrigues Santana, Porsora i anbestigadora de la Ounibersidade de Trás-ls-Montes i Alto Douro (UTAD). I ne l fin de la sesson dançórun ls pouliteiros de Cunstantin.
La biblioteca
Las fiestas de la cidade tubírun inda muitas outras atibidades, tamien fúrun eiditadas por la câmara obras amportantes, para la léngua mirandesa i para la cultura, que son – elementos de gramática mirandesa , de l P. Moisés, - Manuel José Lopes,Tiu Pepe, Gaiteiro da Freixiosa (1850-1924) , de Mário Correia i Abílio Topa, - Miranda do Douro-Guia , de Ernesto Abílio Vaz i – Documentos para o Estudo da Arquitectura Religiosa na Antiga Diocese de Miranda do Douro – Bragança, de 1545 a 1800 , de António Rodrigues Mourinho.
Ls pouliteiros de Cunstantin (retrato de arquibo)
Muitas son las pessonas que porqui trabálhan para la cultura mirandesa (la léngua, l património, l’ambiente, l turismo i las tradiçones). Parabienes a todos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
