Ampeçórun yá onte las comemoraçiones de la passaige de Sendin a bila i cun ua atibidade que hai que loubar. L HOIJE nun calha l que stá bien solo porque nun gusta de quien l faç, nin agaba porque quier agradar, l HOIJE, solo por nun saber, ou por star mal anformado, ye que nun dá las amboras ou faç criticas anjustas.
La giente que onte fui al riu era bastante
Siempre tenemos defendido que l riu puode i debe de ser ua mais balie para Sendin, mas para esso, hai que lebar alhá las pessonas ou criar cundiçones para que eilhas porcúren l riu. I la Junta de Freguesie tem feito esse trabalho i nas bísperas de la fiesta de la bila lieba las pessonas a andar de barco ne l riu i faç alhá ua merenda para ls que ban.
L barco iba cheno de giente
La biaige pul riu ye un spetáclo
Mas para alhá de la biaige de barco, las pessonas podírun andar puls carreirones amanhados i que ye outra atibidade amportante. Caminar a la borda de l riu oubindo la checharras i las perdizes a cantar, oubir ls palombos brabos a namorar i sentindo ls oulores de las arribas, por antre ua peisage de sonho, ye algo que nun se puode perder.
Ls bumbeiros stában alhá cul sou barco de salbamento
Fizo-se la fogueira para assar l cochino, mas nun assador próprio
Fui ua buona tarde de cumbibio i un ancontro de la giente cul riu, cousa que alguns solo fázen neste die, mas alhá staba l HOIJE para amostrar a todo mundo que Sendin tamien ten riu i tamien hai muito sendinés que l outelízan. Eiqui nun se stá na pasmaceira ou an Marte, nin se perde tiempo cun çcussones para animar a quien nada ten que fazer ou an que pensar, eiqui bibe-se tols dies.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
