Chega l Berano i ampéçan ls torneios de Berano de FUTSAL que se fázen nas aldés alredor de Sendin i que tráen moços i moças de todo l Praino. Estes torneios son amportantes para se dáren a coincer ls nuobos jogadores que serbirán para reforçar las eiquipas de l çtrita de futebol.
Jogo Miranda – Palaçuolo
L torneio mais partecipado ye siempre l de Atanor, yá que l campo ye mesmo al lado de la Associaçon i desta son sócios muitos sendineses i este anho l presidente de l G. D. de Sendin, ye tamien l presidente de la mesa de la Assamblé Giral de la Associaçon de Atanor. Por esso l torneio ten mais anteresse i bai a ser amportante para l G.D.Sendin arranjar ls jogadores para l prócimo campeonato.
La mesa de árbitos i sitio de ls suplentes
L torneio ajuntou muita giente i partecípan bárias eiquipas que jógan até manhana quaije sien çcanso. La final será por la tarde de l die 12, mas son muitas las taças i tamien ye dado un prémio an denheiro a las purmeiras eiquipas. Porqui ls moços págan para jogar i son las associaçones i ampresas que patrocínan las eiquipas.
Las taças
Ls que stában a ber
Hai tanto moço a tratar destas cousas i a ourganizar i a fazer l Praino andar para lantre. Quando será que se le dá l debido balor i la debida atençon? Para ls que stais loinje, sabei que son muitos, por esso dai-le mais apoio i deixai de fazer caso de ls poucos que bénen solo de quando an quando a creticar i nunca fázen nada. Cumo púoden saber que hai cientos de moços a partecipar, se solo s’ampórtan culs partidos an tiempo de eileiçones i l diç-que-diç-que. Futebol nun gústan, pouliteiros ye cousa de l passado, agricultura faç calhos, criar ampresas ye arriscado a nun ser que las fágan outros para eilhes mandar i nós ye que somos ls malos?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
