Nun stamos inda ne l dia de Santiago, que ye die 25 de Júlio, mas yá hai tinta raçada. Fui pal riu i ye ua pena l que se bei. Las arribas çpaixarinadas, mais parécen un deserto, sien chober hai meses, todo bai secando. Tener arribas i dezir que son lindas ye fácele i berdadeiro, mas de las arribas tamien faç parte l home i ándan a scamugi-lo deilhas.
Este ye un sitio adonde inda bai giente
Fui alhá que bi la tinta raçada
L HOIJE ye siempre de ls purmeiros a amostrar l que stá bien i a agabar l que tenemos, para falar mal chégan ls ambejosos. Mas hai ua cousa que nun podemos calhar, que ye la politica que se stá fazendo de scamugir l home de las arribas. Nun puode haber Parque de l Douro Anternacional sien giente.
Onde l home trabalha hai todo, azeitunas
Almendras bien criadas
Para haber buonas praias i buonos jardins nas cidades, quanto se gasta?
Será que solo hai denheiro para mos cuntroláren i fiscalizáren i nun hai para ajudar a quien querga trabalhar a tratar de las arribas? Hai susidios, mas para ls recebir hai que gastar mais que l dán.
Las arribas poderíen tener mais sítios cumo este
Cumo podeis ber, drento de dies yá hai ubas para comer. Tenemos buonas cundiçones para todo, bonda que mos déixen trabalhar i nun mos tíren la gana de l fazer.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
