Mais ua bienal de la maçcara i este anho tubo muita cousa de antresse para l Praino. L “MASCARTE 2009” fui dedicado a la arte i tubo la sue parte cultural cun la apresentaçon de la sposiçon de la “máscara i rituais do douro” de Balbina Mendes, ua pintora de l nuosso cunceilho i la apresentaçon de l libro subre la “Mascararte” que stubo a cargo de Amadeu Ferreira.
Outra de las nuobas deste anho fui l rebibir de la musica cun la gaita i l tambor cumo partes de la bienal. Ls gueiteiros animórun l desfile cun las sues musicas por las rues de la cidade, delantre de ls grupos de maçcaras de ls studantes i de las aldés alredror de Bergáncia.
Ls trajes i las maçcaras son mui queloridos i dan a la bienal ua alegrie que anima toda la giente que bei la sue passage por las rues, mas este anho fui pena ser un die de chuba, l que tirou algua animaçon al desfile, mas chegou bien para animar ls caretos i las moças por adonde eilhes passában.
Este anho la bienal tubo tamien la partecipaçon de grupos de Çamora fruito de un trabalho antre ls pobos de ls dous lados de la raia.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
