Cun l’ajuda de la Pantorra , Bomioso tubo la sue purmeira jornada micologica i ls roques i ls míscaros fúrun reis de l comer ne l fin de sumana na casa “ Albergaria Vileira ”, un sitio mui antressante para se ir comer na bila de Bomioso. Por todo lado hai buonas einiciatibas aporbeitando l que de melhor tenemos ne l Praino. L HOIJE tamien bai stando atento a todo i bai dando a coincer estas cousas, para que quien stá loinje saba que hai muita bida para alhá de la “politica”.
Yá que stamos an Bomioso mais ua buona ambora:
La Cámara de Bomioso alargou ls ancentibos a la natalidade ne l cunceilho i astanho stá a pagar las bacinas de la meningite i de la rotabírus para todas ls ninos, nun solo ls que nacírun astanho, mas ne ls anteriores, zde qu'inda stéian a tiempo de ser bacinados contra estas malinas.
Basta que ls pais requesíten la bacinaçon, que custa cerca de 400 ouros, “ua quantie que muitas famílias de la region nun púoden pagar, i cumo nun son oubrigatórias nin fázen parte de l Plano Nacional de Bacinaçon, muitos quedában sin las tomar por nun tenéren possiblidades eiquenómicas, queremos acabar cun esso”, splicou Jorge Fidalgo, bice-persidente de la Cámara de Bimioso.
Esta ye ua forma d'ajudar las famílias i de cuntribuir pal oumiento de l númaro de nacimientos i que se ajunta al Prémio de l Bebé de l Anho, criado an 2002 i que zde anton yá apoiou financeiramente dezenas de famílias i mais de 175 ninos, antre aquel anho i 2008 la Cámara daba un prémio de 500 ouros a cada ninico que nacie i zde l'anho passado oumentou l'ouferta para mil ouros.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
