Hoije fui die de montarie an Atanor, l die nun staba mui buono porque chubisnaba, mas nin por esso la montarie fui menos animada. Ye cierto que la chubisna fizo cun que alguns caçadores nun aparcíssen, mas inda se ajuntórun ls neçairos para la fazer.
L die staba de chuba
La montarie ampeça cun las anscriçones de ls caçadores que ban a partecipar i apuis de l sorteio de las puortas, adonde han de quedar a la spera de ls cochinos brabos, hai l desaiuno que nestes causos ye a la moda anglesa. Come-se i bebe-se bien para eisercer bien la funçon.
La mesa era farta
Quando ampeçou la montarie, l tiempo cumpuso-se i fui un regalo andar pul monte i quedar nua puorta adonde se podie apreciar toda la beleza de l termo de Atanor. Nestas oucasiones nun se puode andar duns lados para ls outros rezon porque fui deficel tirar mais retratos.
L termo ye ua beleza
La cena
La montarie nun dou an nada yá que deixemos scapar ls poucos cochinos brabos que aparcírun, eilhes tamien yá ban treinados i scapórun por ls sitio adonde nun l podimos chegar, mas inda se quedórun a rir yá que un cochino brabo inda tubo tiempo de matar un perro que se arrimou demias. Ganhemos la cena que stubo bien animada.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
