Por todas las aldés de l Praino se fázen las fogueiras de Natal, mas cada beç bai sendo mais defícele seguir la tradiçon, porque bai faltando la giente i quando acuntécen anhos cumo este, cun niebe i chuba, muito pior. Na nuite de la missa de l galho inda se arrimou bien giente i la fogueira staba baliente, habie quemer tradecional para todos, mas l friu i l fumo, lougo mandórun a la cama la maiorie.
La fogueira de Sendin ne l die de Natal
Cumo podeis ber, ne l die de Natal yá pouca giente se arrimou a la fogueira, nós inda fumos ber las fogueiras de las outras aldés alredror de Sendin i quaije todas stában meio apagadas i sien giente a la borda, solo Atanor tenie la fogueira a modos que se bisse. Son desta fogueira ls retratos que ponemos a seguir.
La fogueira de Atanor ne l die de Natal
L temporal que se ten sentido por todo lado faç cun que la giente tenga algun miedo i nun salga a la rue i a nós passa eigual, la anternete tamien nun stá mui cierta i tenemos que abrebiar las amboras.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
