Por todo lado las anchenas aparcírun adonde menos se speraba, inda que ls mais bielhos andássen siempre a dezir que un die inda ibamos a passar quatro, por bias de l pouco cuidado que tenimos cula acupaçon de ls terrenos acerca de ls rius i de ls rieiros. La auga ye terrible i naide la puode prender, hai que le dar campo dezíen eilhes, se nó lieba toda delantre deilha. Fui l que acunteciu nestes últimos dies de l’anho.
Mas l’aire tamien ye outro eilemento de la natureza que debemos respeitar, tanto sirbe para mos acarinar la cara, cumo para mos atirar al suolo sien que mos aprecatemos. Yá ibamos desafeitos de ambiernos tan rigurosos, mas tenemos que mos habituar de nuobo. Quien nun quier bun pai acaba por tener malo padrasto i nós pouco fazemos por tratar bien la natureza, naide puode sperar nada de buono de quien maltratamos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
