L HOIJE ye tamien un sitio de cultura i nada melhor que lembrar la corrida de San Silbestre que zde l anho 1925 se cuorre todos ls anhos an San Paulo, ne l Brasil, ne l ultimo die de l anho. Ye l único çporto que nunca deixou de se fazer zde que ampeçou, mesmo durante la guerra. Preguntareis bós: mas que ten Sendin a ber cun esso? Pus hai que lembrar l que Sendin fui i que puode tornar a ser, bonda pensarmos mais ne l bien de la nuossa tierra que ne l denheiro para ls nuossos bolsos i pensarmos mais ne l coletibo que an sermos ls reis senhores. L Grupo Çportibo de Sendin tamien tubo atletismo i hai que ampeçar a screbir la stória de ls nuossos atletas. Quien se lembra de l corredor Chico , un rapaç negro, que representou l G. D. Sendin nas San Silbestre de Bergáncia i de l Porto i que acabou por ir para l Boabista? Quien sabe adonde stá?
Manuel Faria que ganhou la San Silbestre de 1956 i 1957
Rosa Mota que ganhou la purmeira de las sues 7 bitórias an 1981
Carlos Lopes que ganhou an 1982 i 1984
Aurora Cunha que ganhou an 1988
La San Silbestre passou a fazer-se an muitas tirras de l mundo i ye ua de las corridas mais partecipadas de todas, tamien yá se fizo an Sendin. Queda eiqui este teçtemunho para ber se l nuobo anho trai nuobas eideias i faç rebibir l que de buono yá tubimos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
