Onte l chocalheiro andou por las rues de Bempuosta.
Cunta-se que l diabro tentou Nuossa Senhora i por esso fui cundanado a pedir smola para Eilha i l sou filho, l Nino Jasus.
L chocalheiro representa, hoije, l diabro i anque la sue máçcara seia terrible i medonha, que inda faç arrepiar muita giente, l chocalheiro ye ua figura agradáble i chena de segneficado. Bestido de lino spesso tenhido de preto, l chocalheiro aparece-se cun ua státua “tauromórfica”. Nas puntas de ls cornos trai dues laranjas spetadas, cae-le de l queixo ua barbielha de beche, trai cogada ne alto de la cabeça ua bexi(g)a de cochino chena de aire, na tiesta ten un circo zenhado i, caendo pula cara, ua pequeinha serpiente, na mano trai uas tanazes i trai ua serpiente grande arrodeada a la cinta.
Mas la tradiçon de l chocalheiro ben yá de antes de l Crestianismo i l sou segneficado nun serie tanto repersentar l diabro mas, cumo dezie António Maria Mourinho, ls simblos de l bui i de la serpiente queríen representar la fuorça i la fertelidade, esta tradiçon asi cumo la de la “bielha” de Bila Chana i tantas outras, inda a comemorar-se por todo l Praino, son tradiçones que ténen la sue ourige nas fiestas de l solstício de Ambierno, de ls primitibos pobos de toda la Tierra de Miranda. Ls fruitos que l chocalheiro lieba na puota de ls cornos, assi cumo ls que recuolhe, son l símblo de ls fruitos que se deseában i deséian pa l nuobo anho.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
