Ls mardomos deste anho pensórun dar ls reis ne l Sagrado i para esso teníen todo porparado, até íban a acender la fogueira de nuobo, mas la chuba metiu miedo i acabórun por zistir de la acender, mas cumo teníen chamado l “Grupo de ls Reis 84” de Miranda para cantáren ls reis, a la salida de la missa, estes tocórun i cantórun ls reis i lebórun la giente para l salon de la Junta.
L “grupo de ls reis 84”
Cantórun ls reis ne l Sagrado
La giente nun se fizo rogada i fúrun muitos ls que fúrun a quemer ls reis. Fui ua maneira defrente de dar ls reis. A la nuite nunca iba muita giente, porque l tiempo nin siempre stá buono i poucos se abintúran a salir a la nuite, inda que para quemer ls reis. La tradiçon yá nun ye l que era.
La giente parece que gustou
I alhá fui atrás de l “grupo de ls reis 84”
Las mardomas sperórun la giente a la puorta de l salon i l “grupo de ls reis 84” fui l purmeiro a antrar i fúrun lougo pal trabeado adonde animórun la tarde, tocando bárias canti(g)as de ls reis, anti(g)as i nuobas, porque nun podemos quedar solo agarrados al passado i la bida solo ten sentido se furmos capazes de fazer l nuosso feturo a cada die que passa.
Las mardomas spéran la giente
L grupo yá drento de l salon
Ne l trabeado animórun la tarde
La mesa staba chene
Ls que fúrun als reis
Quemiu-se, cantou-se i beilou-se, parece que l anho ampeça bien, la sociadade stá biba i muito se puode fazer quando las pessonas se assocían.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
Mais retratos desta publicaçon
