L HOIJE quedou mais un die ne l Porto por cousa de l gelo, mas porque nun querie que todos ls que léien l HOIJE quedássen sin las amboras de l die, fui a ber alguns sendineses e ls sítios onde trabálhan ou stúdan..
L Spital “Santo António”
L Spital “Santo António” ye l Spital para onde ban ls sendineses que percísan de tratar las sues malinas, quando esso yá nun se puode fazer ne l Spital de Bragança ou percísan de tratamentos speciales.
La Ounibersidade de l Porto
Ne l Spital trabálhan muitos sendineses, quier anfermeiros ou anfermeiras i ye un sendinés l director de l serbicio de Obstetrícia. Apuis fumos a ber la Ounibersidade i las bárias faculdades onde stúdan muitos sendineses i onde hai porsores sendineses, i tamien ye un sendinés, director na faculdade de angenharie.
La Ounibersidade Lusíada
Tamien nesta Ounibersidade se formórun muitos sendineses i hai porsores nas faculdades de Arquitectura i Eiquenomie, i ye director tamien un sendinés. Nun bamos eiqui a dezir ls nomes de todos, mas son mais que giente hai an alguas aldés.
L campo de l F.C.Porto
Cumo muitos sendineses gústan de l F.C.Porto i porque ye un de ls melhores campos de bola de Pertual, fumos a ber l stádio de L Dragon.
Falemos cun muitos sendineses i la maiorie, todos ls dies léien l HOIJE, l que mos deixou cuntentos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
