Apuis de la niebe i de l cenceinho bino la chuba fuorte por todo l paiç i an alguas aldés alredor de Sendin inda se mantenie l gelo. La manhana fui de nubrina i chuba a mostrar que stamos ne l Ambierno. Mais ua ambernada.
La manhana staba frie
La lagona de Fuonte Aldé, staba gelada i cumo podeis ver, junto de las árboles staba todo albo de niebe i parecie que habie nebado. Mas cun la chuba durante l die todo zaparciu.
La lagona de Fuonte Aldé
A la tarde i nuite tornou l friu i la chuba por todo l Praino tornando las stradas peligrosas para quien tenie que salir de casa. Para manhana todo mos diç que bai a ser pior.
Die de chuba
Este ten sido un anho mais friu que ls últimos anhos, mas la giente cumo dezie ua ti de mais de uitenta anhos – “hoije aguanta-se melhor l friu porque nun hai la fame d’atrás”. Que nun buolba nunca mais.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
