Atanor ten bários lhapos cun graburas rupestres l que proba que l sou termo ye habitado hai miles d'anhos i ye d'alguns destes lhapos que bos bou a falar, para bos aguçar l'antresse pula sue stória i cumo houmenaige a todos ls tanoreses, que cumigo partílhan las raízes dun sprito rudo d'atitudes, mas doce an sentimientos.
Hai lhapos na Rieira de las Beigas i na Rieira de Bal Palheiros, bários deilhes cun graburas sendo ls mais amportantes ls de las Fragas de la Lapa i de Bal Spinheiros, Rieira de las Beigas i l de las Aguçadeiras, de las fragas de l Picon de las Penas de l Romon i l de las fragas de l Picon de Bal Palheiros.
Para melhor localizaçon fazimos un pequeinho bídeo para buôssa ourientaçon i tamien para poderdes ber de que tipo de graburas se trata.
La doutora Marie de Jasus Sanches, de la Ounibersidade de l Porto, studou estas graburas i deilhas fizo un trabalho, an 1988, cumo cuntribuiçon pa l studo de la pré-stória reciente ne l Praino Mirandés. Trabalho que se puode ancontrar na Faculdade de Letras de la Ounibersidade de l Porto. Nós miesmos tenemos ua cópia que mos fui oufrecida pula outora, por tenermos colaborado ne ls studos i tenermos sido ls anformadores de la localizaçon de ls lhapos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
