Retratos de Cristóvão Pires (Cecílio)
Até al fin de l purmeiro trimestre deste anho, la cámara de Miranda de l Douro bai a criar ua eiquipa d'ajudas caseiras als bielhos. L'eideia ye ajudar ls bielhos que se manténen nas sues casas i que necíten d'ajuda para pequeinhos trabalhos caseiros. L'anterbençon de l'eiquipa puode ser pedida atrabeç dun telifonema pa la câmara.
Artur Nunes, persidente de la cámara de Miranda de l Douro, diç que: “Ne l fondo ye criar eiquipas multifuncionales, que púodan ajudar ls bielhos, nun solo na cumponente de la salude, mas tamien an pequeinhas abaries ó outras necidades, atrabeç dun telifonema púoden pedir ajuda para pequeinhas anterbençones, cumo labaige de roupa ó mudança dua bumbilha”, referindo que, para yá, este ye “un purmeiro teste, mas este apoio nun cuntempla la çtribuiçon de quemeres”. “ La Santa Casa de la Misericórdie yá stá a fazer essa funçon, esse ye un trabalho que yá eisiste i nun queremos star a duplicar funçones”.
Estas einiciatibas tamien son mui amportantes i ye por esso que damos amboras deilhas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
