La Associaçon luso-spanhola BinDuero-BinDouro stá a oufrecer pacotes turísticos dun die, durante l qual ls partecipantes son lebados a probar la rica gastronomie de l Parque Natural de l Douro Anternacional (an Pertual) i Parque Natural Arribas de l Douro (Spanha), mas tamien a coincer la paisaige, l patrimonho i cultura de la region trasfronteiriça. L'eniciatiba, chamada “Caminos de l Queiso i de l Bino”, tubo ampeço a 16 de Janeiro i prolonga-se até 14 de Márcio, als Sábados i Demingos. An cada die l'ourganizaçon oufrece un porgrama an defrentes lugares de Pertual i Spanha. Al todo particípan na eniciatiba 16 restourantes, que sírben quemeres eilaborados cun pordutos regionales i acumpanhados cun binos produzidos al longo de l Douro Anternacional. Cumplétan l'agenda uito adegas i trés queisaries.
La Dega de Sendin tamien prtecipa culs sous binos
Las anscriçones para participar púoden ser feitas atrabeç de l sitio:
- www.rutaintercionaldelvino.com
- ó pul númaro de telifone 923141504.
L pacote dun die custa 40 euros. Quien quejir participar solo ne l'almuorço paga 30 euros.
De manhana, ls partecipantes son lebados a ua adega, adonde, para alhá de probar l bino ye feita ua splicaçon de todo l porcesso de produçon, zde la poda de las cepas al porduto final. Segue-se l'almuorço, nun de ls restourantes aderentes, cumpuostos por quatro quemeres, dous de ls quales eilaborados cun queisos de la region. A la tarde stá prebista la bejita a ua queisarie, para que ls besitantes púodan probar, mas tamien coincer todo l porcesso de l fabrico de l queiso. Antre ls períodos de degustaçon, stan prebistas bejitas guiadas para que ls partecipantes púodan coincer tamien la paisaige, la cultura i l patrimonio de la region.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
