La sposiçon eitenerante de azuleijos feitos de pinturas i que bárias antidades preparórun para fazer ber a las pessonas la necidade de dar sangre i miolha de la queluna, stará a la bista de todos, ne l pabelhon multi-ousos de Miranda de l Douro, de l die 28 de Febreiro até al die 13 de Márcio. Dar sangre i miolha de la queluna ye mui amportante para ajudar a curar ciertas malinas, que doutro modo nun serie possible ou pul menos, serie muito mais defícele.
Alguas scuolas de l cunceilho staran yá anteressadas an colaboráren nesta einiciatiba i pensamos que la scuola de Sendin tamien lebará ls sous alunos a Miranda cun la colaboraçon de la Câmara. L HOIJE cumo siempre dá-bos la ambora para que ls que quérgan, podéren saber a tiempo i íren a ber la sposiçon.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
