Stá a chegar la Primabera i esta semana l tiempo yá parece anunciar la sue chegada. Las chubas pássan a scarabanadas, cumo ye ousual ne l més de Márcio, por esso la giente diç “scarabanadas de Márcio” i l Sol brilha mais i calece la tierra fazendo ls árboles abrolháren i ls animales salíren para ampeçáren ua nuoba bida. La bida ne l campo amostra l sou ancanto, ye tiempo de ls que bíben nas cidades procuráren las sues tierras de ourige i la Páscoa ye buona altura para esso.
Para bos lhembrar que Sendim bos aspera tamien i stá cada beç mais guapa fiç este pequenho trabalho para nun bos admirardes muito al chegar. Son las antradas de sendin, mas para ls que nun púoden benir irei fazer outros cun las outras rues i sítios, para poderdes ber l que bai demudando por toda la bila.
“Sendin !!!
Linda aldé de amor,
Toda chena de grácia
I de mocidade en flor.
Lhabradores
A cantar na arada
I, na madrugada,
L boieiro i l pastor ” .
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
