La Cámara Munecipal de Mogadouro, la Associación Jubenil Gustabo Felipe (de Bila Nuoba de Foç Coa), l “Ayuntamiento zamorano de Manzanal de Arriba” i la Associación Jubenil “Las Arribes del Duero”, antidades antegrantes de la AECT Duero-Douro , son promotores de l Fórum Trasfronteriço de Moços Rurales, apresentado ne l passado die 1 de Febreiro na Delegaçón del Goberno, an Castilla i León. Trata-se de ua strutura de participaçon na bida política para todos ls moços de ls 187 munecipios antegrados na Agrupaçon Ouropea de Coperaçon Territorial Duero-Douro.
Stan porgramadas seis mesas redondas i seminairos cun todas las associaçones jubeniles de l território i culs própios moços. Esta strutura, que custituirá un modo de participaçon democrática prebilegiada pa ls moços, ten prebistos bários atos até al die 31 de Júlio i spera mobelizar 700 moços durante todos estes meses, ls quales repersentarán ls cerca de 15.000 moradores ne l termo de l'agrupamiento antre ls 18 i ls 30 anhos d'eidade.
Die 27 de Márcio haberá ua mesa redonda an Trabanca, Spanha para apresentaçon de l programa de l Fórum.
Ye amportante que ls nuossos moços partecípen. La AECT pagará todos ls gastos cun las biaiges i mantenéncia de ls moços que se anscrebíren. Nesses dies haberá tamien bejitas turísticas i atebidades para ls moços. Quien quejir puode ir al sitio www.duero-douro.com i partecipar yá ne l die 27 de Márcio na Trabanca.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
