La banda fui nuoba an bários jornales nestes dies i l HOIJE tamien bos quier deixar eiqui un teçtemunho desso, porque hai muita giente que ben al HOIJE por outros sitios cumo podeis ber ne l www.sendim.net .
Agában-se de ser la purmeira banda rock agrícola i son causo ounico a cantaren mirandés, susídios agrícolas i tratores, cun acordes de l mais puro rock de la pesada. “ Surrealistas ” ye de las bocas cun que yá fúrun cunfruntados la que mais agrada als Pica Tumilho, cinco moços mirandeses que hai 12 anhos criórun uma banda an homenage a la agricultura.
Nua altura an que “l a laboura stá de rastros ” i “ ls fundos de la UE fúrun bien (mal) gastos ”, dous angenheiros, un anfermeiro, un studante i un porsor, quíeren amostrar que ls rurales ténen feturo i dar ua “ alma nuoba a la abandonada agricultura ”. De ls cinco, solo un cuntina a bibir an Sendin, ne l cunceilho de Miranda de l Douro, mas garánten que, al cuntrairo de outros que salírun de l Praino para trabalhar i studar, “ nun somos daqueilhes que abandónan la agricultura ”. An pouco mais de ua década, yá granjeórun un clube de amigos – “ Ls Picanços ”–, inda que solo ne l Nordeste Rural, i cunseguírun trasponer la raia de la region cun cuncertos na Mealhada , Biseu, Leiria, Braga, Lamego i pur ende afuora.
Ténen an bandas cumo ls AC/DC, las refréncias sonoras i nas çamarras, gorros, jaquetas, biendas, motores de rega i outros artimanhos agrícolas. La roupa, ua mescla de quelores, ye la eimage de marca de ls PicaTumilho. Emílio ye l criatibo de la banda que façl cómicas letras “ l die a die de l pobo ” eisaltados na guitarra de Pedro, nas teclas de Bruno, na baterie de César i ne l baixo de Nicolau, i inda, la musica de la tradecional gaita de foles.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
