L IC5 bai ampeçando a parecer ua strada pul Praino i las obras cuntínan i yá stan a la antrada de l termo de Sendin, mas inda hai porblemas cun alguas spropriaçones l que bai atrasando las obras. Las obras son acumpanhadas siempre por un arqueólogo que bai bigiando ls trabalhos para poder defender melhor l património stórico i siempre que haba algo amportante, son feitos todos ls trabalhos neçairos para preserbar ls achados.
Ua tenda abriga l sitio de ls trabalhos
Alguns sítios stan yá refrenciados, mas cumo l Praino fui un de ls sítios de Pertual adonde la preséncia romana fui amportante, alguns mais poderán aparcer. Junto a Variz, nun sitio adonde yá se speraba que aparecisse un poboado ou sitio habitado, aparecírun aliçaces de ua casa i lougo se mandou fazer uns tudo arqueológico.
Un grupo de moços i moças ourientados por ua arqueóloga stan a fazer las scabaçones i nós stubimos a ber, nun bos amostramos ls retratos de la scabaçon porque nun tenemos outorizaçon, mas podemos yá adelantrar por conhecimento que tenemos de outras staçones arqueológicas, que se tratará de ua bila romana.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
