La Copratiba cun la colaboraçon de la CORANE ten benido a fazer bárias açones de formaçon para ls sous associados i onte acabou mais ua dessas açones i que ansinou a fazer licores cun la augardiente de l bagaço de las sues ubas i cun ls fruitos i yerbas de l Praino, de modo a podéren daprender mais ua forma de podéren outelizar melhor ls sous produtos.
Las açones de formaçon solo tenerán anteresse i cumprirán l fin para que son feitas, se fur para daprender algo que outelize melhor ls recursos ou que déien mais anstruçon ou ansínen nuobas tequenologies. Muitas ténen sido las açones para ls trabalhadores i para ls associados i muitas mais se irán a fazer.
Las cuntas de l anho, de la Copratiba , yá stan prontas i ls associados poderán cunsultar-las na Copratiba, para ne l die 28, die de la Assamblé Giral , las podéren aprobar cun cuncéncia. Ye siempre cun alegrie que bos podemos dezir que, mesmo nun tiempo de crise, la nuossa Copratiba cuntina cun salude.
Ne l fin de ls cursos ye siempre agradáble ber cumo ls que partecipórun, fázen ua merenda, lebando cada un algo para comer i bober. L HOIJE fui i quedou para ber cumo era i para probar ls licores.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
