Zaparécen las niebes, yá la yerba torna a las prainadas, la fuolha a las arbles, la tierra demuda i antre ls cunhos, apuis de minguáren, ls rius cúorren. Anquanto chube i neba eibernamos, mas mal aparece un die soalheiro spebitamos-mos, hai que tratar de la bida, ye assi la bida de ls lhabradores.
A purparar la pua
Para ls menos abisados eiqui stamos nós a dezir-bos que ye tiempo de anxertar. Sabemos que cada beç se usa menos, mas hai que mantener ua prática que inda ye de las melhores para preserbar las spécies i mantener ciertas plantas que doutro modo nunca eijestirien ne l nuosso termo ou pouco tiempo biberíen.
L anxerto
Muita giente poderie tener toda la culidade de árboles de fruito i cun pouco trabalho, mas pássan la bida a falar que hai que defender l’ambiente i preserbar ciertas plantas, mas nada fázen a nun ser falar i screbir subre esso. Para esses la agricultura ye solo l que dá denheiro, tan afeitos stan a esso que nin se lhémbran de poner ua árbole. Ua árbole era l mínimo que cada un deberie poner i ye tan amportante cumo screbir un libro.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
