L Die de la mai era yá festejado na Grécia Antiga i an Roma. Ls romanos festejában l Die de la Mai an honra la Cyble , la mai de ls sous diuses, anquanto ls griegos l celebrában an honra de Rhea, mai de ls sous diuses i mulhier de Cronos. An Pertual, l Die de la Mai era festeijado a 8 de Dezembre, mas atualmente ye comemorado ne l purmeiro Demingo de Maio.
Mas l die un de Maio ye l die de las maias i ye uso la giente comer castanhas i poner un ramo de scoba florida nas puortas de las casas. Las castanhas cómen-se, dízen, para nun doler la cabeça i mos librar de malinas durante l anho, anquanto que la scoba florida ye para que las bruxas nun éntren nas casas i ls spritos malinos nun mos béngan fazer mal.
Stou mesmo a ber alguns de ls que pénsan que sáben todo i que solo eilhes ye que ténen rezon, que esto son pantominas ou que quien scribe estas cousas nun tem mais nada que fazer. Naide puode querer que las outras pessonas séian cumo eilhes porque cada un ye libre de pensar i crer. L HOIJE solo scribe porque quier que todo mundo saba para melhor poder decidir.
Quanto a spritos i bruxas, muito hai inda que daprender i studar para poder haber certezas, mas se nun se poníren las questones nunca chegaremos a saber la rezon de las cousas i muito menos quien ten la rezon.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
