Este ye l segundo anho que se faç, an “São Pedro Velho” de l cunceilho de Mirandela, la feira de l bino i de l morangano i podeis quedar a saber, que nun ye mais ua feira que se faç solo porque hai que fazer fiestas, mas porque ye un modo de amostrar l trabalho de ua tierra que ye solo ua de las que mais moranganos porduç an Trás-ls-Montes. Nada mais que 100 000 Kg por anho i que yá ten bários biticultores, cun binhas nuobas i a porduzir binos de buona culidade.
La Trasbinis , que ye ua associaçon de biticultores cun quien la nuossa Copratiba ten buonas relaçones i cun quien trabalha para pormoçon de ls binos de Trás-ls-Montes por todo mundo, apoia estes biticultores i apoiou la feira. Ls nuossos binos stubírun alhá bien representados i cumo podeis ber pul bideo, ye cun ua amostra deilhes que acaba l bideo. Ye assi que se apoia la agricultura de ua region i nun ye por acaso que la nuossa Copratiba ye respeitada por toda la region, por esso faç parte de la CVRTM (Comissão Vitivinícola de Trás-os-Montes), cun un representante na direçon, l presidente de l Cunseilho Fiscal i quatro eilementos ne l Cunseilho Giral.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
