Ls mais nuobos de tan afeitos que stan als cumpotadores i a las nuobas tequenologies, ban perdendo l uso de screbir a la mano i inda mais l de screbíren ne l papel para mandar rezones als que stan loinge, todo ye mais fácele se se mandar un e-mail ou ua mensaige pul telemóble, mas houbo tiempo an que nada desso era possible i ls correios eran l único meio de antregar las mensages, que teníen que ser screbidas nun postal ou nua carta.
L bideo d’hoije ye subre ls postales de hai por ende 50 anhos i que amóstran cousas bien anteressantes. Para ls mais bielhos ye un alerta para irdes a ber la sposiçon i para ls mais nuobos ye un modo de quedardes a saber cumo era l modo de mandar mensaiges. Mas pul bideo podeis quedar a saber alguas cousas subre ls postales anti(g)os i cumo fúrun amportantes. Tamien podeis ber alguas de las mensaiges de l prencípio de l séclo i de la frente de batalha de la I guerra mundial.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
