Hai quien steia mais anteressado an arranjar modos de se sentar ne ls sentalhos de l cunseilho scolar de l Agrupamiento de Scuolas de Sendin, que de anformar la giente de l que se passa. Mas cun tanto friu ye natural que se querga calecer ls sentalhos. Mas l que queremos saber ye se la scuola de Palaçuolo bai a ancerrar por tener menos de 21 alunos i se l Agrupamento de Sendin bai a quedar solo cun ls alunos de ls purmeiros anhos.
Tamien gustariemos de saber se la scuola adonde stan ls alunos de ls purmeiros anhos bai a ser dada para outras cousas i para serbir a quien. Nun stamos eiqui a dezir se será buono ou malo, se será melhor ou peor, mas la giente ten que saber l que se stá a fazer a las scundidas i por uns poucos.
L que anteressa a todos debe ser tratado por todos i para todos tenéren coincimiento. Ls partidos stan habituados a fazer todo cumo se fússen ls duonhos de todo, mas yá bamos fartos de pantominas, cumo biaiges sien saber para quei, cursos sien saber de quei i fiestas sien saber porquei?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
