Abriu an Picuote l’Ecomuseu Tierra Mater cun la sposiçon “Cultibos,Yerbas i Saberes”.
L'ecomuseologie, cunceito i mobimiento criado an Fráncia na década de 1970, ten cumo oujeto l’Home i l sou meio. L'home i l sou meio ye tamien l'home i l sou território, l lugar adonde naciu, la sue aldé, l termo, l território, la region. L'ecomuseu debe proponer ua bison global i sin rutura antre l'home i l meio, cumbidando la quemunidade, que l sirbe, a agir i a cuntribuir pa l sou própio zambolbimiento.
L’Ecomuseu debe ser un laboratório que permita spurmentar, sub l pretesto de l patrimonio, nuobas formas de turismo cultural. Las questones abiertas pula prática de l’Ecomuseu dében dar lugar a antercámbios de spriéncias antre todos aqueilhes que pénsan i agen de forma a permitir al público acupar l centro de las preocupaçones.
L’Ecomuseu Tierra Mater – Ecomuseu de la Tierra de Miranda centra-se ne ls quatro eilemientos primordiales – l'auga, la tierra, l fuogo i l'aire – proponendo atebidades de dinamizaçon i de balorizaçon relacionadas cun estes eilemientos i culas práticas tradecionales zambuolbidas na region.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
