Cumo bos habie pormetido onte, pongo hoije l bideo de la segunda parte de la procisson de la Senhora de la Lhuç , onde podeis ber tamien a San Marcos, apostolo i santo, que ye benerado tamien eiqui, por ser l portetor de ls animales. Se reparardes na einage, ten un bui an pie del. Mas l melhor deste bideo ye poderdes ber cumo las eimages éntran na capielha al fin de la procisson. Éntran de arreculas, cousa que pouco se bei ne ls outros pobos.
Mas l bideo ten inda outra cousa que bal la pena ber, que ye la çcarga de foguetes que botórun ne l fin de la procisson i que datrás, quando se podie botar l fuogo a rigaleira porque nun habie l peligro de ls fuogos cumo hoije, era l melhor sinal que se podie dar de que la fiesta era grande. Mardomos que nun botássen ua çcarga baliente de fuogo a la antrada de la Santa , nun prestában para nada. L sermon tamien yá nun ye nada de l que era, hoije até para fazer un sermon hai que tener muito cuidado cul que se diç, fáltan curas i la giente nun ten muita pacéncia para oubir sermones i ye melhor fazer ua prática (era assi que se chamaba l que dezie l cura a seguir al eibangeilho).
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
