Quando la giente bai a la fiesta de la Senhora de la Lhuç , diç solo que bai a la Lhuç , porque antes de ser fiesta de la Senhora de la Lhuç , yera alhi que se ancuntrában ls pobos de ls castros de la region, pul tiempo de l Equinócio de la Primabera. Equinócio ben de l latin aequus (eigual) i nox (noite) – noites iguais. Esse uso cuntinou siempre i aquando de la romanizaçon i de l crestianismo, fui outelizado para melhor cuntatar culas pessonas i hoije ye ua de las feiras i fiestas mais amportantes deste tiempo, an toda la region.
Este bideo ye de la purmeira parte de la procisson i por el podeis ber la cuntidade de giente que stubo alhá assi cumo la eimage de Nuossa Senhora de la Lhuç i de San Marcos, portetor de ls animales. La banda que acumpanhou la procisson fui la banda de Miranda. Manhana yá podereis ber la segunda parte de la procisson cun la antrada de las eimages na capielha, que ye anteressante i inda l fuogo que deitórun nessa altura.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
