Mais ua einicatiba de la APEGA de Atanor que fizo la fiesta de las abes, desta beç na aldé de Bila Chana. Son muitas las atibidades durante l anho porque la APEGA ye ua associaçon de giente que bieno para l Praino a saber de la bida i eiqui bibe i trabalha, fazendo de la proteçon de la raça azinina ua atibidade diária i promobendo la cultura drento de ua eideia de zambuolbimento rural, que quier antegrar las bibencias de las pessonas de l Praino.
L bideo amostra bien l que ye la atibidade de la APEGA i cumo diç l sou presidente, Beterináiro Miguel, l mais amportante ye fazer cousas cun la giente i durante todo l anho i nó fiestas de beç an quando i porque mos págan para las fazer, porque son Sol de pouca dura i quando acabáren ls subcidios nunca mais las fázen. Las fiestas ou son de todos i para todos ou l melhor ye nun las fazer. Quien quier musica ten que la pagar!
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
