La associaçon “Mirai q’alforjas” de Sendin, ourganizou un torneio de paint-ball ne l termo antre Sendin i Atanor i adonde ls moços i moças que gústan de l jogo, fázen als Sábados ls sous treinos. Desta beç fui mesmo al sério i ne l torneio partecipórun jogadores de ls cunceilhos de Mogadouro i Bomioso. Fui un ancontro de moços i moças de l Praino.
Fui un torneio bien animado i l HOIJE tubo la oucasion de ber i registrar las peripécias de l jogo. Fui anteressante ber que las eiquipas eran formadas por moços i moças misturados que amostrórun que cada beç mais, la eigualdade de ls sexos ye ua realidade. Houbo taças i cumbibio antre todos.
L paint-ball ye un jogo que simula ua guerra antre dous grupos, mas adonde las balas son sustituidas por bolas de gel que al bater ne ls jogadores, ls píntan de ua quelor i que amostra al árbitro que esse jogador debe ser eileminado de l jogo. Ganha quien cunsigue eileminar todos ls jogadores de la outra eiquipa, ou que acabado l tiempo de jogo, tubir mais jogadores.
Puode parecer un jogo biolento, mas ye un jogo que treina las capacidades de atençon, agelidade i çtreza de ls moços i moças i que ls lieba a cuntatar cun l termo, tan guapo an tiempo de Primabera.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
