Cun la chegada de la calor hai que tener mais cuidado cun ls fuogos i tamien, cun las atibidades ne l riu i, porque la Tierra passa por un período de catástrofes, hai que tener las fuorças de porteçon cebil porparadas para l que puoda suceder. Eisiste un plano de porteçon cebil munecipal i ye para saber que todo stá porparado que se fázen estes eisercicios para treinar ls bumbeiros i outras antidades de porteçon.
Hoije houbo alguns simulacros de acidentes i manhana ban a cuntinar. Por la manhana fui un simulacro de un acidente de carro, na strada 221, cun necidade de outelizar ls meios de desencarceramento, que son ls meios para tirar las bitimas de carros quando quédan presas. Nun mos fui possible acumpanhar este eisercicio por esso nun tenemos retratos.
A la tarde fui l simulacro de un acidente ne l riu, cun un barco de recreio i ye deste eisercicio que bos amostramos ls retratos. Las açones de salbamento tubírun l’apoio de ls bumbeiros de Mogadouro i Bomioso i ls salbamentos fúrun feitos cun apoio de ua eiquipa na barraige de Bemposta i un posto ne l cimo de las arribas.
A la nuite fui l simulacro de un fuogo i manhana teneremos un salbamento nun sitio mui peligroso de las arribas, cun outelizaçon de meios mui sofesticados. Las eimages son mui guapas i por eilhas podeis ber cumo son guapos l riu i las arribas ne l termo de Sendin i agora podeis benir sien miedo a passar eiqui las bacanças, porque la sigurancia tamien stá salbaguardada.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
