Ls bumbeiros de l Praino fazírun mais ua proba de treino desta beç nas arribas para ls lados de l Ceramal an Sendin. Ls bumbeiros de Sendin ye que ourientórun l’eisercício an que partecipórun tamien ls bumbeiros de Mogadouro, este eisercício fui l ultimo de un fin de semana de treinos.
Mesmo sendo un simulacro nun deixa de ser ua açon cumo se fusse de berdade i l HOIJE stubo alhá i puode ber que ls bumbeiros pássan por situaçones bien deficeles para podéren salbar ls outros. Era ua açon para recolher feridos que stában nun sitio adonde ls carros nun podíen ir i ls bumbeiros tubírun que descer por cuordas.
Oubimos alguas bezes dezir que estes eisercicios son para spetáclo ou para fazer de cunta, mas se un die ye preciso salbar aguien que por nun tener cuidado ou por acidente, se ancuntrar nessa situaçon, naide quier saber se ls bumbeiros stan ou nó treinados, eisígesse que ban.
Fumos a ber i fui todo tan eigual a ua açon berdadeira i ls bumbeiros passórun por situaçones tan reales que inda houbo un bumbeiro que se feriu. Que naide precise, mas podeis tener la certeza, la nuossa associaçon de bumbeiros i ls nuossos bumbeiros todo fázen para star porparados.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
