Para ls que nun son de l Praino i léien l HOIJE l titalo de la ambora nun quererá dezir muito, mas para toda la giente de la Tierra de Miranda ye ua de las fiestas mais amportates. Ye la fiesta de la Santíssima Trindade , na sue capielha de l cabeço de la Trindade , que queda antre Sendin i Fuente Aldé, mas la fiesta ye ourganizada pur Fuente Aldé, yá que l cabeço, ye termo desta tierra.
Perde-se ne l tiempo la mimória desta fiesta, que serie anterior yá al crestianismo. Ne l cabeço eisistie un santuário pré-romano, talbeç de ls Zoelas, pobo que habitaba este termo quando ls romanos eiqui chegórun. Este pobo nunca fui cunquistado, mas antes apreendiu la cultura romana i la sue léngua i acabou por fazer parte de l ampério, que serbiu, tenendo muitos de ls sous filhos ido a fazer parte de las legiones romanas.
Muito haberá que studar subre esso, mas las lapides ancuntradas amóstran bien que apuis de serbíren las legiones, na Gália i na Grã-Bretanha, regressórun i acabórun sepultados nestas tierras. La fiesta de la Tridade era sitio de ancóntro de ls que partíen, que nessa fiesta buobíen i hai mesmo ua cantiga que diç:
Mirandun se fui a la guerra
Nun sei quando buolberá.
Nun sei quando buolberá!
Se buolberá pula Pascua,
Se pula Trinidade…
Este anho la fiesta tamien stubo baliente, las merendas nun dezíen que hai crise i las mocidades amostrórun que cuntínan a amar las sues tierras i búolben siempre pula Trinidade…
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
