Die de l nino an Miranda de l Douro
L munecípio de Miranda de l Douro porporcionou onte, als cerca de 350 ninos de l cunceilho, un Die de l Nino defrente, cumo ben acuntecendo zde hai alguns anhos. Ls outocarros lebórun ls ninos i ninas para Miranda adonde cumbibírun i merendórun todos juntos.
Ls mais pequeinhos tubírun l'ouportunidade d'assistir a ua peça de triato, a brincar ne ls ansuflables, a pintar, a ber sposiçones antre muitas outras atebidades. Este die debe ser siempre comemorado, mas l mais amportante ye criar ne ls ninos un sprito nuobo de cumbibéncia i alegrie.
Tamien l persidente de la Cámara , Artur Nunes tubo la possiblidade de cuntatar diretamente culs mais nuobos. “Esta ye ua eimaige mui guapa, ls moços de l cunceilho todos reunidos. Ye ua alegrie mui harmoniosa i cuntagiosa” , falou assi l'outarca.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
