Muitas bezes pregúntan-mos l que hai ne l Praino para poder ber ou bejitar i nun tenemos nien eideia l que dezir, até mos aburrimos muitas bezes por nun sabermos nós miesmos adonde ir a passar un rato. Oubimos tamien dezir que porqui nun se passa nada, que stamos loinje de l mundo. L HOIJE , cun las sues amboras de todos ls dies, ten amostrado que nun ye assi, l Praino ye un sitio adonde se puode bibir i star bien.
Para ls dies que ende bénen eiqui bos deixo alguns eibentos a que podeis ir:
- “ Auga”: digressones 2009 ne l Museu de la Tierra de Miranda
Se inda nun tubistes l’ouportunidade de ber la sposiçon “Auga”: digressones 2009, podeis fazé-lo agora ne l Museu de la Tierra de Miranda, até al 30 de Júnio.
Esta ye ua muostra cun trabalhos de José Guimarâes, Coletiba Imaginarte-Almada 2009 i Anstalaçon de l artista plástio Carlos Ribeiro.
- XIII Passeio Pedestre ne l Praino Mirandés
Durante l próssimo die 6 de Júnio podeis coincer un berdadeiro mundo de suonho que faç çpertar l'eimaginaçon atrabeç de ls sentidos. Eiqui podeis ber,sentir, oubir, cheirar i degustar la berdadeira cultura, stória i tradiçon mirandesa! Ide a çcubrir la fantástica beleza de las paisaiges de las Arribas de l Douro neste que ye l XIII Passeio Pedestre ne l Praino Mirandés. Al longo de 8 Km i al sonido de la gaita de foles por caminos mouriscos, ide zbendar ls mistérios de ls Castros de Bal D'Águila i de San Juan de las Arribas.
Las anscriçones prolongan-se até a la próssima sesta-feira.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
