Bamos apoiar l'eiquipa d'anfantis
Ne l próssimo Demingo ye l todo ó nada para que l'eiquipa de ls anfantis de l mirandés se torne campeona. Para esso, pedimos l'apoio de to la quemunidade para que steia persente ne l Stádio de Santa Luzia an Miranda de l Douro a apoiar esta grande eiquipa que, la maiorie de l tiempo de l campeonato, se mantubo ne ls purmeiros lugares. Neste derradeiro jogo, ls binte i dous magníficos liderados pul treinador Bítor Hugo ban anfrentar l'eiquipa de Bila Flor.
De referir, inda, que l trabalho zambuolbido al longo de to l campeonato fizo cun qu'estes moços atletas crecíssen an bários nibles, tales cumo çportibos, cíbicos, culturales i sociológicos. Todo esto solo fui possible debido al apoio de todos ls pais, eiducadores, treinador i amigos que siempre se sforçórun para qu'este suonho de ls mais nuobos se rializasse.
L HOIJE tamien deseia que ls moços mirandeses gánhen l campeonato i lembra que las eiquipas de ls mais moços de Sendin, tamien jógan ne l campo de Santa Luzia porque yá ten yerba i porque son apoiadas pula câmara. Por esso hai ua buona colaboraçon antre todas las eiquipas de ls mais moços i ua bitória de uns ye de todo l cunceilho.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
