Oubimos dezir que las bacanças nun son para todos, mas l que ye cierto ye que ne l Berano todo mundo gusta de uns dies de bacanças nin que seia solo para ir a la fiesta de la sue aldé ou para ls que trabálhan fuora de l Praino beníren a ber la sue tierra i ls sous. Las deficuldades son muitas para la maiorie, mas la bida ten mesmo que cuntinar.
Pul Praino yá bai habendo melhores cundiçones i por todas las aldés se ban fazendo sítios agradábles para se poder star un rato ou mesmo comer ua merenda, loinje de la poluiçon i de l barulho de las cidades. Vila Chã da Ribeira tamien ten l sou parque de merendas i bien arranjado, mesmo junto al pobo.
Inda me lembro de se falar an muitas aldés cumo lugares de l fin de l mundo, mas houbo un tiempo an que l porgresso chegou a quaije todas, mas l que bemos hoije ye l regresso al tiempo de fame. Mas ne l Praino inda hai giente que rejiste i sítios para passardes bien uns dies de bacanças.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
