L HOIJE ye un spácio adonde ls moços i moças sendinesas ban siempre que ténen un cachico para saber de Sendin i de l Praino, mas l HOIJE tamien nun deixa de star atento a eilhes i ye de ua merenda que eilhes fazírun, nó por comer la merenda, mas para falar de ls porblemas de Sendin i mantenéren biba la amizade antre eilhes.
Son dessa merenda ls retratos que pongo hoije, mas tengo que poner eiqui, que por muito que alguns quérgan dezir que nó, ls nuossos moças i moças stan atentos i Sendin nun acaba, nin las sues anstituiçones. Púoden modeficar-se i trasformar-se, porque la bida bai mudando, por esso nun ye preciso andar a alarmar la giente, para aparecer nas telbisones. Serie bien melhor deixar tratar de las cousas a quien sabe. Yá chega de politiquice barata.
Deixo-bos l que dixo un moço de ls que stubo na merenda, que cumo sou pai fizo, tamien el stá atento:
“Prof. Almendra, ambio an aneixo alguas eimaiges dua merenda que fazimos ne l parque, na cidade de l Porto, ne l passado Sábado. Teniemos to l gusto que fusse publicado ne l Hoije pus todos somos spetadores atentos de l SAL i de l sou spácio diairo. Fui ua tarde bien passada, éramos cerca de 20 Sendineses cun buona merenda adonde nada faltou. Comiu-se bien i bebiu-se melhor, jogou-se ua cartada, demos uns toques na bola i cumbersemos subre las nobidades de la nuossa tierra, Sendin”.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
