Quando beniemos para Sendin de ua reunion de la Cunfrarie de ls Einólogie i Gastrónomie de Trás-ls-Montes i Alto Douro bimos aprocimar-se ua grande truniada, l que fizo cun que mos atrasessemos a la Assamblé de Freguesie, mas feliçmente para nós que la truniada se zbiou, mas puls bistos acabou por caer an Bergáncia tenendo dado muitos stragos an casas, tirras i animales, cumo podeis ber pul bideo.
De tiempos a tiempos hai bariaçones ne l tiempo que faç i sabe-se mesmo que hai ciclos de dezenas i cientos de anhos, que fázen cun que las cousas se repítan. Ampeçou agora un ciclo que, puls bistos, será de grandes truniadas, esso bai a fazer cun que cáian, onde menos se spera, grandes porradas d’auga i piedra, cun prejuízos para las gientes desses sítios. Para quien anda pul campo ou nas stradas, debe fazer cuidado porque mais bale prebenir que tener que remediar. Sendin ten scapado, speremos que Santa Barbela mos defenda.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
