Para alguas pessonas ber dançar las pauliteiras puode parecer que ye algo que nun stá d’acordo cun la tradiçon, mas angánhan-se ls que assi pénsan, porque la dança yá ye dançada por mulheres zde hai mais de 70 anhos, que tengamos amboras desso i esto eiqui ne l Praino, porque noutras partes yá la dançában las moças muito antes.
Por outro lado, la tradiçon bai-se fazendo tamien tols dies, porque l que ye moda hoije será, passados 50 anhos, algo que fará parte de la memória nesse tiempo. “La dança” (ye assi que se debe dezir) torna-se mais rica cun las pauliteiras i este anho na fiesta de la cidade, grabemos alguns lhaços de las pauliteiras de Miranda i ye de l lhaço “la berde” l bideo que bos ponemos. Bale la pena ber…
