Por todo l Praino se realízan las fiestas de Berano i ls festibales de música son l melhor para ajuntáren ls moços i moças i para traéren giente a passar las bacanças nas nuossas tierras, mas cumo siempre hai ls que nun sáben l que hai por las bárias tierras, deixo-bos la ambora de ls trés mais amportantes de l Praino neste fin de sumana.
La banda Xanerge
L Festibal Antercéltico , an Sendin, que bai yá ne sou 11º. anho i que ye l mais amportante eibento de Berano ne l Nordeste Trasmontano. Son dous dies de música flok (die 30 i 31), ne l Parque de las Eiras i cun bandas de las mais cunsagradas na Ouropa.
Tamien la APEGA faç l “o burro e o gueiteiro”, Festibal Eitinerante de Musica Tradecional , un festibal cun caminadas de burro i sposiçones de strumentos musicales i la atuaçon de bandas de l Praino, cun ls Galandum Galundaina a dáren als dies de l Festibal ( 2 a 5 de Agosto) l maior brilho. Funte Aldé, Palaçuolo, Bilar Seco i Caçarelhos son las aldés onde se fazerán las atibidades i las caminadas.
Mogadouro faç este anho l RED-Burros , Festibal aéreo para praticantes de bolo planado i que se realiza die 31 ne l campo de abiaçon de Mogadouro, yá acerca de la aldé de Azinhhoso, que ten tamien la sue feira de burros, por esso l Festibal se chamar Red-Burros .
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
