L bideo que hoije bos amostramos ye subre la segada tal cumo se fazie d’atrás i que ye ua fiesta que se faç na aldé de Palácios acerca de Bérgáncia i que tols anhos trai muita giente a passar uns dies ne l Nordeste. Mas nun ye solo para ls de fuora, mas mais para ls que bíben noutras tierras i son naturales deiqui, que assi bénen mais bezes i gástan eiqui l que habíen de gastar noutras tierras, ne l tiempo de bacanças.
Puode parecer que son cousas cun pouca amportánça, mas l zambuolbimento de ua tierra ten que ser sustentado i hai que tirar l melhor de las atibidades que se púoden fazer an cada region. Mas para esso hai que haber pessonas que moblízen i sában outelizar ls recursos que ls ampostos de todos nós çponiblizan. Tamien ls trabalhos agrícolas púoden gerar mais balies i hai que saber outelizá-las. Ye creminoso, quando ls serbícios de agricultura sírben ls amigos i ls políticos an beç de las associaçones de agricultores.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
