Hoije e manhana sendin ye un sitio de cultura, porque l Festibal Antercéltico ye un berdadeiro manatial de cultura, inda que muitos cúiden que ye solo musica folk, mas la berdade ye que ye todo un munton de atibidades culturales.
Feira de strumientos musicales junto a la eigreija
La Feira Eibérica de Strumientos Musicales, un eibento que pretende dibulgar l setor de las artes i oufícios de raiç artesanal, nomeadamente ls strumientos musicales. Nesta Feira ye proporcionada la ligaçon antre ls músicos i ls custrutores, assi cumo cun l público an giral, sendo ua berdadeira ouportunidade para coincer la bariadade i la riqueza de la música tradecional.
Houmenage al gueiteiro Delfim Domingues
Dues atibidades amportantes tamien ban a ser l’ansino de l mirandés que se bai a fazer manhana i passado ne l salon de ls bumbeiros i la houmenage al gueiteiro Delfim Domingues, un de ls melhores gueiteiros de l Praino, yá nun stá antre nós, mas inda mos lhembramos bien del i ye amportante que estas houmenages se fágan para nun quedáren squecidos ls que tando fázen pul Praino, cada un na sue bida i ne l sou oufício.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
