Luís Ferreira, un artista sendinés, ten an sposiçon, na casa de la Cultura , anti(g)a scuola purmária de Sendin, ls sous quadros de que bos amostramos alguns retratos. Cumo podeis ber hai muitos sendineses que pássan zapercebidos porque nun ténen tanta fuorça cumo outros ne ls meios de quemunicaçon, mas l HOIJE quier que todos púodan ser coincidos i eiqui stá a amostrar este pintor que ten yá ua obra amportante.
Tamien se stá a fazer un curso de lhéngua mirandesa, ne l salon de ls bumbeiros, ua einiciatiba de la Associaçon de lhéngua mirandesa i que ten cumo porsor l nuosso Amadeu Ferreira, l grande studioso de la Lhéngua i que por amor a eilha dá l curso sin cobrar nada, estes si que son ls mirandeses de honra, ls que dan sien sperar nada an troca.
Tamien yá son coincidos ls nuobos mardomos de Santa Bárbara i yá ampeçórun a trabalhar cun fuorça na segunda nuite de l Festibal Antercéltico, mas para ls mais curjidosos, manhana yá bos poneremos ls nomes deilhes todos, apuis de séren anunciados. L HOIJE sabe todo an purmeira mano, mas sabe guardar las anformaçones até al die an que dében ser coincidas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
