Ls balones de guardar l bino de la Cooperatiba stan a ser aporbeitados para outras cousas i son yá quatro ls que stan a serbir nuobas atibidades i serbícios, tanto para la Cooperatiba cumo para las outras associaçones i até para l stado i autarquies. Hoije la Cooperatiba apoia todas las einiciatibas de l Praino i las sues anstalaçones i serbícios son ua refréncia.
Dous libros fúrun lançados i fui anteressante que l ato fusse nun de ls balones, un sitio anteressante i que ye ua einobaçon, mas hai que tratar de l aire cundicionado, porque cun tanta calor la giente alfou-se un cachico, fui lançado un libro de José Francisco João Fernandes, padre de Cicuiro, an mirandés i pertués “ LA MONA L MAIO ” cun traduçon de Alcides Meirinhos i eilustraçones de Ana Afonso.
Ls libros
L’outro fui mais la apresentaçon an sendin, porque yá habie salido ne l die de la cidade, an Miranda, ye un trabalho subre la obra de l nuosso cunterráneo Pe. Mourinho, que ten tamien un CD cun registros sonoros de l’arquibo de l’eilustre sendinés. L trabalho para esta obra fui de Olinda Santana, Mário Correia i Domingos Morais.
Tamien yá bamos tenendo telbison i este ye l bideo de la caminada de la giente, zde la praça até al Parque de las Eiras, atrás de ls gueiteiros, para ir al Festibal a ber las bandas folk que animórun la nuite de Sábado.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
